კატები საყვარელი ცხოველები არიან, თუმცა ხშირად, თითქოს უმიზეზოდ გვკბენენ და გვკაწრავენ, რაც არც თუ ისე სასიამოვნო შეგრძნებაა.
ხშირად ადამიანს არ ესმის, თუ რატომ იქცევა მისი ცხოველი ასე. კატები, როგორც წესი, უმიზეზოდ არ კბენენ და კაწრავენ ადამიანს. ამის მიზეზი უმეტესად არის ინსტინქტი, ემოცია ან გარემო.
5 მიზეზი, თუ რატომ გვკბენს და გვკაწრავს კატა
გსურთ იცოდეთ, თუ რატომ იკბინება ან იკაწრება კატა? ქვემოთ ჩამოთვლილია სხვადასხვა მიზეზი, რომლის დახმარებითაც შეიძლება კატა კბენას გადააჩვიოთ.
გადაჭარბებული სტიმულაცია
კატებს უყვართ მოფერება, მაგრამ ხანდახან შეიძლება ზედმეტი მოგვივიდეს და კატა გაღიზიანდეს. როდესაც ზღვარს გადავცდებით, მისი რეაქცია არის კბენა ან კაწვრა.
ეს ხშირად ხდება მგრძნობიარე ადგილებში მოფერებისას, როგორიცაა მუცელი ან კუდის ბოლო. სხეულის ენაზე ყურადღების მიქცევა, როგორიცაა აპრეხილი კუდი ან დაძაბული, გაბრტყელებული ყურები, დაგეხმარებათ თავიდან აიცილოთ კატის ზედმეტი სტიმულირება.
აგრესიული თამაში
კნუტები და პატარა კატები ხშირად ერთვებიან უხეშ თამაშში, რომელიც მოიცავს კბენას და კაწვრას. ეს მათთვის ბუნებრივი გზაა ნადირობის უნარების გამომუშავებაში და სოციალიზაციისთვის.
თუ კატა არ არის სათანადოდ გაწვრთნილი კბენის გასაკონტროლებლად, მან შეიძლება გააგრძელოს ეს ქცევა ზრდასრულ ასაკშიც. ხელების ნაცვლად სათამაშოების გამოყენებამ შეიძლება თავიდან აიცილოს მტკივნეული ნაკბენები და ნაკაწრები.
შიში ან შფოთვა
კატა გადადის თავდაცვაზე, როდესაც საფრთხეს გრძნობს. თუ მას ეშინია, მიუხედავად რეალური საშიშროების არ არსებობის შემთხვევაში, თავდაცვის მიზნით შეიძლება უკბინოს ან დაკაწროს ადამიანი.
ახალმა გარემომ, ხმამაღალმა ხმამ ან უცხო ადამიანებმა შეიძლება გამოიწვიოს შიშზე დაფუძნებული აგრესია. შეშინებულ კატას უმჯობესია მივცეთ სივრცე და დამშვიდების ნება, რადგან თავიდან ავირიდოთ აგრესია.
უკმაყოფილების გამოხატვა
ხანდახან კატა შეიძლება იმედგაცრუებული იყოს სხვადასხვა მიზეზით და ეს ყველაფერი აგრესიით გამოხატოს. ამიტომაც, შეიძლება უკბინოს პატრონს ან სხვა შინაურ ცხოველს.
ამ ტიპის აგრესია შეიძლება იყოს არაპროგნოზირებადი, მაგრამ გარემოში სტრესული ფაქტორების შემცირება და უეცარი ურთიერთქმედების თავიდან აცილებამ, შეიძლება მინიმუმამდე დაიყვანოს დაკბენის ან დაკაწვრის შანსები.
დისკომფორტი
ტკივილმა ან დისკომფორტმა შეიძლება აიძულოს ყველაზე მეგობრული კატაც კი, აგრესიულად იმოქმედოს. თუ მშვიდი კატა მოულოდნელად იწყებს აგრესიის გამოხატვას, ეს შეიძლება სწორედ რომ დისკომფორტთან იყოს დაკავშირებული.
ისეთი პირობები, როგორიცაა ართრიტი, კბილის ტკივილი ან კანის ინფექციები იწვევს დისკომფორტს, რაც კატას უფრო მგრძნობიარეს ხდის შეხების მიმართ. თუ შეამჩნევთ ქცევის უეცარ ცვლილებებს, რეკომენდებულია ვეტერინართან ვიზიტი.
შეჯამება
კატების კაწვრის და კბენის გამომწვევი მიზეზი სხვადასხვა რამ არის, შიში, შფოთვა, ტკივილი და ა.შ. მათი ქცევის მიზეზის გაგება დაგეხმარებათ თავიდან აიცილოთ არასასურველი აგრესია და შექმნათ უფრო პოზიტიური ურთიერთობა თქვენს შინაურ ცხოველთან.
